പശുമരം 

കുഞ്ഞമ്മാമാ കുഞ്ഞമ്മാമാ..

നമ്മക്ക്... ഒരു പശുവമ്പ ഉണ്ടായിനേ...

ആ പശുവമ്പക്ക്...ഒരു കുഞ്ഞമ്പ ഉണ്ടായിനേ..

ചോന്ന കുഞ്ഞമ്പ, നല്ല കുഞ്ഞമ്പ..

ആ, കുഞ്ഞമ്പക്ക് ഞാനാന്നേ.. പുല്ലു പറിച്ചു കൊടുക്ക്വാ..

ഞാനാനാന്നേ... കാടിയുമ്പം കൊടുക്ക്വാ 

കുഞ്ഞമ്മാമാ കുഞ്ഞമ്മാമാ..

ആ കുഞ്ഞമ്പയില്ലേ.. ൻറെ കൂടെ...

പാടത്തും, പറമ്പത്തും,കാട്ടിലും,ഒക്കെ വര്വേ..

ആ കുഞ്ഞമ്പക്ക്.. ഞാൻ മുത്തം കൊടുക്കലുണ്ടേ..

ആ കുഞ്ഞമ്പ... ഇക്കും.. മുത്തം തരാറുണ്ടേ..

കുഞ്ഞമ്മാമാ, കുഞ്ഞമ്മാമാ.. 

ഒരീസില്ലേ.. കുഞ്ഞമ്മാമാ..

ഞാനേ... ഉസ്കൂളി പോയതേന്വേ..

വെരുമ്പക്കില്ലേ.... കുഞ്ഞമ്മാമാ...

ഞാനതു പറയൂലാ...

ഏ കുഞ്ഞമ്മാമാ.. 

പിന്നെയുണ്ടല്ലോ കുഞ്ഞമ്മാമാ..

അമ്മ പറയലാന്നേ...

അപ്പാപ്പനും വല്ല്യേട്ടനും ഒക്കെ കൂടി 

കുഞ്ഞമ്പേനെ കണ്ടത്തില്  കുഴികുഴിച്ച്  നട്ടതാന്ന്...

കുഞ്ഞമ്മാമാ,കുഞ്ഞമ്മാമാ..

എത്ര ദീസായീന്നോ... രാവിലേം  ഉച്ചക്കും  വൈന്നേരോം 

കുഞ്ഞാവ, കണ്ടത്തിൽ പോയി നോക്കുന്നൂന്നോ... 

കുഞ്ഞമ്പ, മരമായി മൊളച്ചു വര്വോ കുഞ്ഞമ്മാമ?

കുഞ്ഞമ്മാമാ, കുഞ്ഞമാമാ.. 

ഈ നാട്ടിലുള്ള എല്ലാ വെഷത്തവളേനെയും-

കൊല്ലണം,അല്ലേ കുഞ്ഞമ്മാമാ?