ചില വീടുകൾ നിലവിളിക്കാറുണ്ട്

നിലയ്ക്കാത്ത നിലവിളികൾ കേൾക്കുന്ന

ഒരു അയൽ വീട്ടിലേക്ക് 

ഒരിക്കലും ഓടിച്ചെല്ലരുത്.

ചില വീടുകൾ

നിലവിളികളുടെ മ്യൂസിയമാണ്.

ഓടിച്ചെന്നാൽ കാണുന്നതോ

സർവ്വസാധാരണമായിരിക്കാം.

മെലിഞ്ഞുണങ്ങിയ 

ഒരു പന്ത്രണ്ടു കാരിയുടെ

നിറവയർ തൂങ്ങിയാടുന്നത്.

കുറ്റബോധം

എന്ന് പേരുമാറ്റിയ ഒരച്ഛൻ

വളപ്പൊട്ടുകൾ ചേർത്തുവെച്ച്

മരുഭൂമിയിലേക്ക്

കടൽപ്പാലം പണിയുന്നത്.

മൂകസാക്ഷ്യം

അമ്മയുടെ രൂപത്തിൽ

മുടിപറച്ചിട്ട് കുനിഞ്ഞിരുന്ന്

മൗനം തപ്പിയെടുത്ത്

പെരുവിരൽ നഖങ്ങൾക്കിടയിൽ

പൊട്ടിച്ചു കളയുന്നത്.

പേടിച്ചരണ്ട വിശപ്പ്

ഒരു കൊച്ചനിയൻ

നിലത്തു പരന്നുകിടക്കുന്ന ചോരയിൽ

ചെറുവിരൽമുക്കി

ചുമരിൽ

വരച്ചുതുടങ്ങിയ

മുന്തിരിക്കുല..

എന്തോ അത്യാഹിതം പ്രതീക്ഷിച്ച് 

ഓടിയെത്തുന്ന ഒരാൾ

സർവ്വം ശാന്തമാണ് എന്ന്

തീർച്ചയായും നിരാശപ്പെടേണ്ടിവരും

നിലവിളിച്ചത്

ആരാണെന്നു സംശയിക്കേണ്ടി വരും.