ബഹുമാനപ്പെട്ട പഞ്ചായത്ത് ഓഫീസർക്ക്

സർ,
ഞാൻ മരിച്ചു എന്നതിന് ദൈവത്തിന്
എന്തെങ്കിലും തെളിവ്  വേണമത്രേ...
ആയതിനാൽ ദയവുചെയ്ത് എന്റെ
മരണ സർട്ടിഫിക്കറ്റ് അനുവദിച്ചുതരുവാൻ
അപേക്ഷിക്കുന്നു. 

                                         എന്ന്,
                                         പരേതൻ
                                         ജീവിതം(Po)
                                           (ഒപ്പ്)

സർ,
അഞ്ചാമത്തെ വരവാണ്.
ഇനിയുമിങ്ങനെ
കാത്തിരിക്കുന്നതിൽ അർത്ഥമില്ല.
ഒരു തെളിവും ശേഷിപ്പിക്കാതെ
 മരിച്ചുപോയ എന്നെ
ദൈവം, സ്വർഗ്ഗത്തിലോ നരകത്തിലോ
പ്രവേശിപ്പിക്കില്ല എന്ന്
തിരിച്ചയച്ചിരിക്കുകയാണ്.

രണ്ടിനുമിടയിലുള്ള
ശൂന്യതയിൽ ഞാൻ തനിച്ചാണ്... 

ശബ്ദമോ,വെളിച്ചമോ, വായുവോ,
വെള്ളമോ സ്പർശനങ്ങളോ ഇല്ലാത്ത
നിതാന്ത ശൂന്യതയിൽ ഒറ്റൊയ്ക്കൊരാൾ...
ഒന്നോർത്തു നോക്കിയേ...

സർ, സർ സാറിന് പറ്റുമോ സർ?
ഒരു പത്തു മിനിറ്റ്?
ആർക്കെങ്കിലും പറ്റുമോ സർ?

ദയവുചെയ്ത് എന്റെ മരണ സർട്ടിഫിക്കറ്റ്...

(ഓഫീസർ എന്നെ ആദ്യമായി ഒന്ന് നോക്കി)

ഇരിക്കൂ 

എന്താണ് പേര്? വീടെവിടെയാണ്?
അച്ഛൻ? അമ്മ? സഹോദരൻ...

പേര്.... വീട്...
ബന്ധങ്ങൾ..
ഉണ്ടായിരുന്നു.. ഉണ്ടായിരുന്നു...
മരിച്ചപ്പോൾമറന്നു പോയതാണ്.
സത്യമായിട്ടും ഞാൻ ഉണ്ടായിരുന്നു സർ..
ദയവു ചെയ്ത് ഒന്നു കമ്പ്യൂട്ടറിൽ നോക്കൂ സർ.. 

ഫെയിസ്ബുക്കിൽ ഉണ്ടായിരുന്നോ?

ഇല്ല സർ ഇല്ല... 

ജീവിച്ചിരിക്കുന്ന ചെങ്ങാതിമാർ?

ഇല്ല, ഇല്ലാ, ഇല്ലാ....
ഓർമയില്ല സർ
മരിച്ചുപോയപ്പോൾ
എല്ലാം മറന്നുപോയതാണ്..
പക്ഷേ, തീർച്ചയായും ഞാൻ ഉണ്ടായിരുന്നു.
അതെനിക്കുറപ്പാണ് സർ..

സുഹൃത്തേ,
എങ്കിൽ പോയിട്ട് പിന്നെ വരൂ
ഒരു പത്തോ നൂറോ വർഷം കഴിഞ്ഞ്...

നിങ്ങൾ മരിച്ചുപോയി എന്നത് സത്യമാണ്.
പക്ഷേ ജീവിച്ചിരുന്നു എന്നതിന് എന്താണ് തെളിവ്?
*