പര്യായങ്ങളിൽ അവൾ

എത്ര പര്യായങ്ങളാണ്

വേശ്യ എന്ന വാക്കിന്!

സങ്കടങ്ങളുടെ കരിമരുന്നു നിറച്ച് 

വിങ്ങിവിങ്ങി ഏതു നിമഷവും 

പൊട്ടിപ്പോയേക്കാവുന്നതു കൊണ്ടാവണം 

വെടി,

പടക്കം 

പൊട്ടാസ് 

തുടങ്ങിയ പേരുകൾ 

ഇത്ര നന്നായി ചേരുന്നത്.

എപ്പോഴും സ്വയം വിൽക്കാൻ/വിൽക്കപ്പെടാൻ 

തയ്യാറായി നിൽക്കുന്ന

ജീവനില്ലാത്ത നൊമ്പരങ്ങൾക്ക് 

ചരക്ക്,

പീസ്‌,

മറ്റേത് 

എന്നിവയൊക്കെ 

നല്ല ഉദാഹരണങ്ങൾ തന്നെ.. 

പെഴ, 

പെലയാടിച്ചി, 

കൂത്തിച്ചി,

വെട്ടിച്ചി,

വെപ്പാട്ടി 

അഭിസാരിക, 

മറ്റവൾ..

അങ്ങനെ വിട്ടുപോയതും 

പൂരിപ്പിക്കേണ്ടതുമായ 

ഒരുപാട് പേരുകൾ വേറെയും... 

എപ്പോഴാണ്

ഞാൻ പരാചയപ്പെടുത്തിയ പ്രണയവും 

നീ മൊഴിചൊല്ലിയ ജീവിതവും 

അവൻ അകാലത്തിൽ ഇട്ടേച്ചു പോയ വിശപ്പും.. 

സ്വന്തം പേരുകളിൽ വിളിക്കപ്പെടുക?

വെറും പെണ്ണ് എന്നെങ്കിലും അറിയപ്പെടുക?

<photo id="1" />